![[Link] Website - Provinzia autonoma de Bulsan - Südtirol](/css/img/APBZ_Logo_Website_DE_IT_LAD.svg){kind=logo}
Biblioteca digitela
Te chësta sezion posses scuvierjer la ressorses digiteles dla biblioteca – nce zaites y libri antics – y ti cialé.
Archivio per l'Alto Adige ie na revista de studies metuda su da Ettore Tolomei dl 1906. Danter i prim culaburadëures fovel Pasquale Villari, Carlo Battisti, Graziadio Isaia Ascoli y Angelo De Gubernatis. La revista vën ora mo al didancuei a Firenze pra l Istituto di Studi per l'Alto Adige coche “Archivio di Studi per l'Alto Adige. Rivista di Studi Alpini”.
Tolomei ulova desmustré la talianità dla region, nce chëla dl Trentin, y l bujën de mëter l cunfin sun l Prëner. La publicazion, che ova sëurantëut si inuem dal departimënt napulionich de chël che Bulsan fova pert dl scumenciamënt dl Otcënt, fova unida secuestreda riesc do che la fova unida ora y la ova gaujà de gran cuntrasć.
Chësta revista à purtà pro a na maniera senificativa ala descuscion scientifica y politica sun la cuestion dl Südtirol ntan l Vintejim secul.
La revista ie unida digitaliseda dal 1906 al 1919.
Atesia Augusta ie stata na zaita che univa dl prim ora n iede al mëns y pona doi iedesc al ann. La univa tl scumenciamënt publicheda dal Ënt cooperatif provinziel dla stampa fascista y dadedò dal Ënt atesin publicazions periodiches.
Chësta zaita periodica, che ie unida ora dal 1939 al 1943, à vivù mumënc storics zariëusc y critics, coche l Pat d’Acel Roma-Berlin y la ntrata tla viera dla Talia, ma nce ntraunides locales de relevanza sciche la Opzions dl 1939 y la criazion dl Alpenvorland.
Dal 1939 ala fin dl 1940, sota la direzion de Mastromattei, ova la zaita n carater tlermënter politich, cun n for majer nteres per persunaliteies y avenimënc internaziunei. Dal jené dl 1941, sota la direzion de Antonio Baldini Rualis, sëurantol la zaita inò la cuverta uriginela y se trasfurmea da mensila a bimestrela ti dajan nce plu atenzion a tematiches locales.
La revista ie unida digitaliseda dal 1939 al 1943.
Combattere! Ie stata na revista dla Federazione di fasci de cumbatimënt de Bulsan, cun i ani dal 1941 al 1943 da pudëi unì a liejer te nosta biblioteca.
Il Cristallo. Rassegna di varia umanità ie na revista cuadrimestrela dl “Centro di Cultura dell'Alto Adige” che trata i problems y la particulariteies dla provinzia.
Sun l catalogh Explora.
La Domenica del Corriere ie stata na revista che univa ora n iede al’ena y che fova unida metuda su a Milan dl 1899 y stlut dl 1989. Dl prim univel ora coche njonta al "Corriere della Sera" y pona iel deventà cunesciù per si gran format y la ilustrazions de Achille Beltrami y Walter Molino. Ti ani Vint y Trënta, cun na edizion de 600.000 copies, fovel la revista venduda miec tla Talia.
Tlo prejentons na lingia de numeri che trata de argumënc liei al raion dla provinzia.
L’Illustrazione Italiana, nasciuda dl 1873 a Milan, ie stata na revista che univa ora n iede al’ena y che univa lieta gën pervia dla cualità de si articuli y ilustrazions. N à lascià de la dé ora tl 1962.
Tlo prejentons na lingia de numeri liei al raion de nosta provinzia.
Il Piccolo Posto ie stata na zaita che univa ora uni doi enes y che fova unida metuda su ai 20 de merz dl 1922 da Umberto Murè y stampeda pra la tipografia Laurin a Maran. De fauré dl 1923 n ova Luigi Barbesino y Emilio Desio, espunënc dl fascism local, sëurantëut l cuntrol. Plu tert ie la zaita unida stampeda dala stamparies Atesina, Temi e Monauni, y la se cunzentrova sun la cronaca locala, dantaldut politica, tulan ite nce articuli per tudësch. L ultim numer ie unì ora ai 10 de nuvëmber dl 1926.
La revista ie unida digitaliseda dal 1922 al 1926.
La Provincia di Bolzano ie stata la prima zaita de rujeneda taliana tl Südtirol y la ie unida ora per l prim iede ai 22 d’auril dl 1927. Te curt tëmp iela deventeda n mesun de nfurmazion mpurtant arjunjan na edizion de n 3000 copies al di y deventan nsci l organ ufiziel dl fascism dl "Adesc Aut". La direzion dla zaita ie mudeda suvënz ti jan do ala diretives fascistes per mené inant la talianità. L ultim numer ie unì ora de setëmber dl 1943.
La revista ie unida digitaliseda dal 1927 al 1942.
Il Trentino ie sta na zaita politica metuda su tl 1868 y stluta tl 1877.
Tlo prejentons n valgun ejëmpli liei al teritore dla provinzia.
La Tribuna Illustrata ie stata na revista che univa ora n iede al’ena y che fova unida metuda su a Roma tl 1890 sciche njonta ala zaita da uni di "La Tribuna". La revista ie deventeda la prima revista ilustreda taliana y ie unida stluta tl 1969.
Tlo prejentons n valgun numeri che trata tematiches liedes a nosc raions.
La Voce del Sella, na revista che univa ora n iede al’ena per la valedes dla Dolomites, ie unida ora cun si prim numer ai 23 de fauré dl 1923. La zaita univa stampeda a Trënt dala stamparia Scotoni e Vitti y la prejentova dantaldut ntraunides dla valedes dl Südtirol adum cun nutizies sun l Trentin y l Belunesc. La zaita mustrova dal scumenciamënt inant si sustëni tler al partit y al rejim fascist.
L ultim numer ie unì ora ai 21 d’auril dl 1927, n l medemo di che l fova nasciù la zaita da uni di La Provincia di Bolzano, cunscidreda si suzessëura.
La revista ie unida digitaliseda dal 1923 al 1927.
La Biblioteca Claudia Augusta à tëut la dezijion de crië na sezion dedicheda ala memoria locala digitaliseda, se cunzentran sun documënc liei ala realtà dl raion dla provinzia. La majera mpurtanza ti vën data ala publicazions de nosc luesc plu danejedes o che ie unides derturedes ultimamënter, acioche les ne vënie nia ruinedes a les tò for inò tla mans.
L travert ie chël de stravardé dala desmincënza scric antics y mëter a despusizion n patrimone bibliografich de gran valor l varentan per la generazions che vën do. Pra i documënc digitalisei iel tesć de stampa prijei, publichei tl Trivenet danter l XVIIejim y l XIXejim secul, che trata dl Tirol y de si ntëurvia dal pont de ududa storich, religëus, archeologich y scientifich.
Breve piacevol lettura d’una replica all’eccell.mo ill.mo signor Gian Francesco Loredano (1655)
Dell’Adige e de’ suoi diversivi. Trattato fisico-matematico, di Antonio Belloni (Venezia, 1774)
Il Lanzichenecco ha le chiavi delle porte d'Italia, a cura della Sucai (Monza, 1914)
Wir Karl der Sechste von Gottes Gnaden erwählter Römischer Kayser... (Innsbruck, 1737)
Diga del Careser-Careser dam - Barrage du Careser (S.l., 1947)
Ultimo ajornamënt: 01/04/2025