Fonds de fotografies

Nosc archif fotografich reprejënta na culezion de imajes prijeda che toca l’essënza y l’evoluzion dl Sudtirol tl tëmp. Chësta culezion unica ie l resultat de proiec defrënc de fotografia de gran valor artistich y documentaristich.

De mpurtanza particulera ie l “Fondo Acciaierie di Bolzano”, na gran culezion cun plu de 4.000 imajes y 20 videos che documentea la storia y l svilup dla fujines d’acel dal 1937 nchina ti ani ’80. Chësta culezion, duneda dl 2006 dala fujines d’acel Valbruna ala Biblioteca provinziela taliana Claudia Augusta, pieta na testemunianza visiva de valor dla cunseguënzes ndustrieles, sozieles y urbanistiches dla fujines d’acel sun la zità de Bulsan y sun duta la region. Pra la imajes iel fotografies dla fabriches, di lauranc y dla produzion y material de retlam coche i spot dla “Lama Bolzano”, che ne conta nsci nia mé la storia de na ndustria, ma nce i mudamënc soziei y culturei che chësta à purtà al raion.

N auter cuntribut mpurtant vën dal proiet “Quattro grandi fotografi per l'Alto Adige”, realisà dl 1996 dal Ufize Cultura taliana dla Provinzia autonoma de Bulsan n cunlaurazion cun la “Fondazione italiana per la fotografia”. Pra chësta scumenciadiva à tëut pert fotografs cunesciui coche Gianni Berengo Gardin, Mimmo Jodice, Angelika Kampfer y Francesco Radino, che à pità si nterpretazion persunela de nosc raion. L ubietif fova chël de documenté l Sudtirol cuntemporan tres na perspetiva da oradecà y nia localistica, crian nsci n documënt storich y artistich mpurtant.

L archif vën amplià mo deplù dal’opres de d’autri proiec mpurtanc, danter l auter:

- “Bolzano città e contrasti: il centro e la zona”, che prejënta la fotografies de Olivo Barbieri y Gabriele Basilico y pieta na vijion unica dla rë urbana de Bulsan.

- “Bolzano ovest = Bozen West” de Gabriele Basilico.

- “Mutamenti + analogie: spazi contemporanei a Bolzano e altrove", na culezion che tol ite i lëures de artisć coche Casolaro, Castella, Fischi&Weiss, Guerrieri, Gursky, Lambri, Linke, Mason, Niedermayr y Vitali y che mët n relazion la lueges de Bulsan cun d’autra realteies de al didancuei.

Chësc archif fotografich ne ie nia mé na testemunianza visiva de nosta storia di ultimi ani, ma nce n strumënt preziëus per tuadëures, studënc y studëntes y apasciunei de fotografia. L pieta na perspetiva unica sun l’evoluzion urbanistica, soziela y culturela dl Sudtirol, pian mumënc mpurtanc che fossa scenó perdui tl tëmp. I truep fotografs defrënc y la varietà de si manieres artistiches garantësc na perspetiva rica y desferenzieda sun nosc raion, nsci ie chësc archif na ressorsa de gran valor per capì y aprijé l Sudtirol te duta si sfumadures.

Fondo Acciaierie di Bolzano – Lista de fotografies (4.100)

Fondo Gianpietro Agostini – Lista de fotografies (40)

Fondo Olivo Barbieri – Lista de fotografies (55)

Fondo Gabriele Basilico – Lista de fotografies (105)

Fondo Gianni Berengo Gardin – Lista de fotografies (14)

Fondo Gea Casolaro – Lista de fotografies (72)

Fondo Mimmo Jodice – Lista de fotografies (7)

Fondo Angelika Kampfer – Lista de fotografies (15)

Fondo Francesco Radino – Lista de fotografies (34)