Deponüda legala

Cun la lege di 15 d'aurí dl 2004, n. 106 sciöche ince cun le regolamënt d'atuaziun D.P.R. 252/2006, él gnü reformé la deponüda legala. Cun la regolamentaziun nöia él gnü arjunt da öna na pert n adatamënt ales formes de publicaziun d'aldedaincö y dal'atra él gnü mudé so obietif. Deperpo che l’aspet dl control ê n iade plü important– da capí dal titul da denant - öga incö la deponüda legala por garantí la conservaziun dl patrimone cultural. Porchël él ince gnü chirí fora na denominaziun nöia: deponüda legala.

Insciö él gnü cherié por garantí l’arpejun culturala dui archifs, un a livel nazional y un a livel regional. Por arjunje chësc scrí dant la lege le dovëi da dé jö 4 ejemplars de vigni publicaziun.

Por realisé l’archif nazional vál debojëgn da ti ortié inant n ejemplar ala biblioteca nazionala de Roma y ala biblioteca nazionala de Firenze.

Por realisé l’archif regional ti él gnü surandé la deponüda legala cun les deliberaziuns dla junta provinziala di 7 de ma dl 2007, n. 1503 y di 6 de messé dl 2009, n. 1772, ala Biblioteca provinziala “Dr. Friedrich Tessmann” y ala Biblioteca provinziala taliana “Claudia Augusta”.
A na moda che la surandada sides plü scëmpla che ara vá á tramesdöes les biblioteches provinziales arjigné ca döes misciuns che vel cina che ares röia tl zënter bibliotecar: öna por la surandada de dötes les operes stampades y öna por la surandada di documënc audiovisuai.

Ala misciun de surandada: Deponüda legala regionala – sënta de surandada de operes stampades, strada Armando Diaz 8, 39100 Balsan mësson ortié inant dui ejemplars de chisc media:

1. foliec y revistes todësces y ladines;
2. libri, brosciüres, chertes geografiches y topografiches, atlanc, placac, jorantins, prospec, musiga stampada y publicaziuns somiëntes che reverda les ativités publiches de ënc y assoziaziuns, sciöche ince grafiches d’ert y fotografies, che é destinades ala publicaziun (te düc i lingac).

Ala misciun de surandada: Deponüda legala regionala – sënta de surandada de operes audiovisuales, strada Marconi 2, c/o Centro Trevi 39100 Balsan mësson ortié inant dui ejemplars de chisc media:

1. foliec y revistes por talian;
2. documënc sonurs y video, grafiches d’ert y video d’artisć, films (ince sön sostëgn digital), microformes (sön sostëgn fotochimich sciöche la pelicula), documënc sön sostëgn informatich en general (por ej. cd-rom, dvd y i.i.) (te düc i lingac).

Les döes biblioteches provinziales se crüzia adöm de tramesdöes les misciuns de surandada y cöi adöm y conservëia i media ortiá aladô de so dovëi de racoiüda.

Fondamentalmënter é düc i documënc o produc editoriai, che s’adressëia a n publich, sotmetüs ala deponüda legala. Al é anfat sce chisc produc vëgn venüs o sce ai vëgn scincá ca o sce ai vëgn partis fora te na forma analogica o digitala.

Al é stlüt fora dal dovëi de deponüda legala i estrac, les proes de stampa, i formulars, les reediziuns zënza mudaziuns, i documënc cun adoranza interna o personala, sciöche ince le material ordinar y cun püch retlam por le comerz.

De plü informaziuns:

• Ester Turbiani, Biblioteca provinziala Dr. Friedrich Tessmann, tel. 0471 471828, e-mail: pflichtexemplare@tessmann.it
• Monica Marcon, Biblioteca provinziala taliana Claudia Augusta, tel. 0471 264444, e-mail: info@bpi.claudigusta.it; m.marcon@bpi.claudiaugusta.it