Biblioteca digitale

La sezione contiene la riproduzione digitale di quotidiani, riviste ed edizioni di opere di interesse locale.

È la rivista quadrimestrale realizzata dal Centro di Cultura dell'Alto Adige con lo scopo di far conoscere i problemi e le peculiarità di questa provincia di confine.

Maggiori informazioni sul posseduto in formato cartaceo sono disponibili sul catalogo ACNP.

Fascicoli completi e singoli articoli consultabili sul catalogo Explora.   

La Tribuna Illustrata ie na revista che univa ora n iede al’ena. Si sënta fova a Roma y la fova unida metuda su tl 1890 coche suplemënt dla zaita da uni dì “La Tribuna”. La fova de gran format y ie riesc deventeda la revista ilustreda che univa ora n iede al’ena plu mpurtanta dla Talia. Ma ntëur la metà dl secul àla giapà la concurënza de “La Domenica del Corriere” y la ie unida stluta tl 1969. Tlo mustrons n valgun ejëmpli cun articuli che à n liam cun nosc raions.

 

Numeri a despusizion

Una dla ncëries de majera mpurtanza dla biblioteches ie la devulgazion dla cunescënza: Chësta ncëria vën nce realiseda tres la digitalisazion de documënc antics. Scebën che l ne mancia nia proiec de digitalisazion de tesć a despusizion sun papier tënd la biblioteches n generel a udëi si miscion tla cunverscion di documënc tl format digitel. De chësc viers va nce la Biblioteca Claudia Augusta.La digitalisazion dl liber antich nteressea la biblioteches da doi ponc d’ududa: l azes y la cunservazion.

L azes te n format digitel lascia pro la despunibiltà de materiai a na maniera che ne fova n iede nianca no da se nmaginé delibran tesć antics da si ijulamënt geografich y i metan da garat on-line tla biblioteca digitela azessibla per duc y da uni luech ntan che l oget uriginel possa unì resservà per nrescides scientifiches y consultazions limitedes y unì per l rest dl tëmp tenì su te cundizions de lum, temperatura y tume plu adatedes.

Cie vën pa digitalisà? L ie na cuestion de economia bibliotechera. La Biblioteca Claudia Augusta à tëut la dezijion de crië na sezion de lecurdanza locala digitaliseda dedicheda a documënc liei ala reltà dl raion. Tenian cont dla ncëria de nosta biblioteca sons unic a una de ti dé majera mpurtanza ala digitalisazion dla operes sun tematiches locales plu danejedes  o restaurauredes da nuef a na maniera che les ne vënie nia inò ruinedes canche les vën consultedes. La mira plu mpurtanta de chësc proiet ne ie defati nia mé chël de delibré dala desmincënza la publicazions plu vedles y nteressantes, ma nce chëla de mëter a despusizion per duc n patrimone bibliografich de gran valor y seguré tl medemo mumënt si cunservazion per la generazions dl daunì. I documënc che ie śën da garat tl format digitel ie stampes de valuta che ie ries da giapé sun l marcià dl anticuariat, i ie duc unic publichei te nosc raions danter l dejesetejim y l dejnuefejim secul y i reverda la tematica dl Tirol y di raions ntëurvia dal pont d’ududa storich, religëus, archeologich y scientifich. L patrimone rich de libri de nosta biblioteca vën adurvà per teses de laureat y de dotorat de nrescida. L ie na funtana mpurtanta per i/la tuadëures de storia locala dl Trentin, dl Südtirol y dl Tirol storich n generel.

I documënc antics y da ncueicundì dla Biblioteca Claudia Augusta devënta, de gra al proiet de digitalisazion, ogec virtuei cun pusciblteies de comunicazion nueves sibe coche funtanes de nfurmazion sibe coche prodoc de cunsum. Chësc proiet reprejentea n liam fertunà danter tecnologia y antichità. 

L’illustrazione italiana

L’illustrazione italiana – dl prim tlameda “Nuova illustrazione Universale” – ie nasciuda a Milan tl 1873 sun scumenciadiva dl editëur Emilio Treves y la ie deventeda na zaita dl’ena lieta dantaldut ti ambienc dla borghejia mesan-auta pervia dla bona cualità de si articuli (scric da scritëures cunesciui sciche Pirandello, Carducci y Verga) y si ilustrazions, realisedes suvënz da artisć de livel coche Achille Beltrami y Luigi Bompard. Bele tl tëmp danter la doi vieres ova la zaita mpue manco suzes y la ie unida stluta tl 1962.

 

Il Trentino

La zaita da uni di Il Trentino – che ne à degun liams cun la revista dal didancuei – fova na zaita che fova unida metuda su tl 1868 y stluta tl 1877. La à suvënz mudà la frecuenza de publicazion, l format y l editëur. Dal 1872 al 1875 iela stata l organ dla Lia naziunela liberela trentina. n. 47 dl 16.10.1875

Per tramedoi zaites pitons n valgun numeri cun articuli che à n liam cun nosc teritore.

La Domenica del Corriere ie stata na zaita metuda su a Milan tl 1899 y stluta tl 1989.

Dl prim univela ora coche suplemënt ilustrà dl "Corriere della Sera" y la univa data pea  debant o venduda a pert al priesc de 10 centejims. La fova penseda coche na “zaita dl’ena per i talians” dal carater de cronaca. Si carateristica fova l format grant che ti dajova truepa lerch a fotografies y dessënies y chisc fova nce na rejon de si suzes. Danter i desseniadëures che à purtà pro a si storia fovel nce Achille Beltrami y Walter Molino. Ti ani Vint y Trënta ie La domenica del Corriere deventeda la zaita plu venduda dla Talia cun na tiradura de 600.000 copies. Tlo prejentons n valgun numeri cun articuli che à da nfé cun nosc raions.

 

La revista de nrescida Archivio per l'Alto Adige ie unida metuda su tl 1906 da Ettore Tolomei (nchin tl 1919 fova l titul ntier “Archivio di Studi per l'Alto Adige con Ampezzo e Livinallongo”). Danter si culaburadëures fovel inuemes cunesciui sciche Pasquale Villari, Carlo Battisti, Graziadio Isaia Ascoli y Angelo De Gubernatis. La revista vën al didancuei  mo ora a Firenze pra l Istituto di Studi per l'Alto Adige, coche “Archivio di Studi per l'Alto Adige. Rivista di Studi Alpini”.

Cun si revista ulova Tolomei desmustré "la talianità" dla region (nce dl Trentin, de rujeneda taliana ma cultura tiroleja) y cundechël l bujën de tré l cunfin sun l Prëner. La publicazion, che ti dajova al raion l inuem dl departimënt napoleonich, de chël che Bulsan fajova pert tl scumenciamënt dl Otcënt, fova riesc unida secuestreda y la gaujova uni sort de descuscions. La revista, che à povester purtà pro plu che uni autra al svilup de na descuscion scientifica sun la cuestion dl Südtirol ntan l 20ejim secul, documentea la situazion alpina dl tëmp n relazion cun la realtà locala.

La revista ie unida digitaliseda dal 1906 al 1919.

L prim numer de “La Voce del Sella. Settimanale per le valli delle Dolomiti” ie unit ora ai 23 de fauré 1923. La zaita univa stampeda a Trënt dala stamparia Scotoni e Vitti. La publicova dantaldut cronaches dla valedes sudtirolejes, ma nce nutizies sun l Trentin y l Belunesc. Si merca fova dal scumenciamënt inant l sustëni dl partit y dl rejim fascist.
L ultimo numer ie unit ora ai 21 d’auril 1927,  l medemo dì che l ie nasciù la zaita “La Provincia di Bolzano”, de chëla che ”La voce del Sella” fova n progenitor.

Atesia Augusta ie na zaita che univa ora n iede al mëns y pona doi iedesc al ann. La univa tl prim publicheda dal Ënt cooperatif provinziel dla stampa fascista y dadedò dal Ënt atesin publicazions periodiches.

La vita de chësta zaita curespuend a un di tëmps storics (1939 – 1943) plu critics y zariëusc a livel internaziunel (Pat d’Acel Roma – Berlin y ntervenzion tla viera dla Talia) ma nce a n tëmp cun fazions pesoces a livel local (Opzions dl 1939 y criazion dl Alpenvorland ).

Scebën che la ova mé abù vita curta, ova la zaita, a desmustrazion dl mumënt storich cumplicà, fat pea mudazions te si atività, redazion y nfurmazion:

Dal 1939 ala fin dl 1940 àla, sot ala direzion de Mastromattei, n rodul “de carater dantaldut politich” y la se nteressea for plu de persunaliteies de relevanza a livel internaziunel ti dajan arta ala ntraunides tl raion europeich;

Da jené dl 1941 sot ala direzion de Antonio Baldini Rualis pon usservé n valguna mudazions: l sëurantò inò la cuverta uriginela, l’azentuazion dl nteres local y la trasfurmazion dla revista che univa ora n iede al mëns te una che univa ora doi iedesc al ann te n numer dopl.

La zaita che vën ora doi iedesc al’ena Il Piccolo Posto ie unì fundà ai 20 de merz 1922 da Umberto Murè y l univa stampà tla stamparia Laurin de Maran. De fauré 1923 iel passà a Luigi Barbesino y a Emilio Desio, espunënc dl fascism local. Ti ani do univel stampà dala stamparies Atesina, Temi y ala fin da Monauni. Sun la plates dla zaita ti dajoven gran lerch ala cronaca locala (dantaldut ala politica), datrai nce cun articuli tudësc, y ala truepa stritaries danter la fazions internes dl partit fascist.
L ultimo numer dla zaita ie unit ora ai 10 de nuvëmber 1926.

La prima zaita de rujeneda taliana tl Südtirol vën ora ai 22 d’auril 1927. Tosc devëntela n mesun de nfurmazion y la arjonj na tiradura de ntëur n 3000 copies al dì deventan nsci “l organ ufiziel dl fascism tl Südtirol" (Gianni Faustini).

Tla sënta dla streda Gilm 15 se mudel ju un ndolauter na lingia de diretëures che ademplësc ala diretives fascistes che mira ala defujion dla “italianità” plutosc che al duvier de nfurmazion. L ultimo numer vën ora tl 1943.

Cfr. GIANNI FAUSTINI, La stampa italiana in Alto Adige, Centro di Cultura dell'Alto Adige, 1978